2ª Autonómica Masculina
Luces e sombras para os nosos rapaces no partido disputado no pavillón municipal de Salceda de Caselas (Salcedaterra) o domingo día 18 de novembro do 2012 ás 12:00 e que enfrentou ó BM. Caselas e ó BM. S.A.R. Este era un deses partidos contra rival directo no que se poden gañar ou perder 4 puntos (os que se suman máis os que non suma o outro equipo). Os nosos rapaces non souberon dosificar e acabaron cedendo a victoria cun marcador final de BM.Caselas 27-30 BM S.A.R.
Daba comezo o partido e os nosos rapaces eran sabedores da importancia do mesmo xa que nos enfrontabamos co que seguramente é o noso rival directo na clasificación para xogar a fase de ascenso. Os xogadores do BM. Caselas sairon a plantarlle cara ós visitantes, tamén moi motivados debido á importancia do partido. Despois dos primeiros 10 minutos de partido o parcial era favorable ós locais por 7-4, grazas a unha sólida defensa e un bo ataque. O dominio dos locais durou ata o minuto 15, momento no que os visitantes se fixeron co control do partido, logrando primeiro o empate no marcador e despois unha vantaxe de dous tantos. Chegados a este punto, xa se percibía que este ía ser un dos partidos máis emocionantes e igualados do que levamos de competición. Ámbolos equipos mostraban boas defensas, así como boas accións en ataque, chegando ó descanso cun resultado de 12-14, se mal non recorda un servidor.
No comezo da segunda metade os visitantes ían por ese punto máis de ritmo o que, sumado ás exclusións dos locais, facilitaban unha vantaxe de 4 tantos despois dos primeiros 10 minutos. Recuperada a igualdade numérica, os locais ían acadar un parcial de 5-0 nos seguinte 5 minutos, poñéndose así un tanto por enriba. Pero no momento decisivo, as presas xogaron unha mala pasada ós nosos, realizando ataques precipitados e descoidando a defensa. Estes desaxustes levaron a 2 exclusións case seguidas a falta de dous minutos para o final do partido, sentenciando ós locais, que non poideron parar os 2 últimos ataques do rival e acabaron case regalando unha victoria que valía máis ca os dous puntos que se perderon. O resultado final foi de BM.Caselas27-30 BM.S.A.R
RECÓRDASE a tódolos asistentes e ó publico en xeral que as portas do noso pavillón permanecerán abertas durante os partidos e que a entrada é totalmente de balde e que o club ten a disposición de todos os asistentes unha cantina con prezos populares. ¡¡¡O NOSO EQUIPO PRECÍSATE, FORZA TERRA SALCEDA!!!